Самостојна изложба на Христина Иваноска
01 Ноември 2012 – 31 Декември 2012
Тековни активности | самостојна изложба на Христина Иваноска | Ова е земјата во која младите девојки прснуваат во смеа без многу двоумење | Музеј на современа уметност, Скопје| куратор на изложбата Мира Гаќина
Иако во современата уметност како тема е присутна веќе повеќе децении, родовата проблематика, најмногу заради недоречената комплексност, продолжува и понатаму да биде актуелна. Христина Иваноска со своето ново дело “Ова е земјата во која младите девојки прснуваат во смеа без многу двоумење”, продолжува на свој начин да ја интерпретира идејата за можните премини помеѓу условните родови категории. Внатрешниот динамичен органски баланс на ќелијата (кутија), авторката го избрала како модул за демонстрација на нејзината претстава за развојот на идентитетот.
Инсталацијата на Иваноска комбинира изработени предмети сместени во дрвени кутии (од даб, багрем, црница и орев) и огледални површини, сите силно oбременети со симболика. Гледани под агол, на публиката и нудат ново читање на сложената идентитетска родова структура.
Квалитетите на сталоженост и смиреност во “неодредливото”, кои обезбедуваат некаква спонтаност, растеретувајќи нé од наметнатите социјални улоги, не водат само кон лична среќа на ослободената хумана единка, туку се предуслов и за вреднување на умереноста / мерката како една од врвните доблести кои инспирираат хармоничен амбиент. Утописки амбиент во кој смеата демонстрира препознавање и радосно прифаќање.
Христина Иваноска е родена во 1974. во Скопје. Во 1997. дипломирала на ФЛУ во Скопје, а моментално е на постдипломски студии на истиот факултет. Иваноска има реализирано единаесет самостојни претставувања и изложувала на голем број групни изложби во галерии и институции во земјава и странство меѓу кои State Museum of Contemporary Art, Солун (2012, 2004), Galerija Treći Beograd, Белград (2012), Slovak National Gallery, Братислава (2011), Neue Gesellschaft für Bildende Kunst, Берлин (2011), Музеј на современа уметност, Скопје (2011, 2010), Open Space – Zentrum für Kunstprojekte, Виена (2010), <rotor> Асоцијација за современа уметност, Грац (2009), Konsthall C, Стокхолм (2008), Magazin4 – Bregenzer Kunstverein (2008), Музеј на современа уметност, Белград (2007), Foundation for Women’s Art, Лондон (2006), Spaces Gallery, Кливленд, Охајо, САД (2005), и други. Таа има оствратено повеќе студиски престои меѓу кои La Cite International, Париз (2011), IASPIS, Стокхолм (2008), ArtsLink Residency Program, Њујорк (2004), The Corporation of Yaddo, Држава Њујорк, САД (2001), Stiftung Künstlerhaus Boswil, Швајцарија (1998). Од 2000 година соработува со уметникот Јане Чаловски, а заеднички изложби и проекти имале во Скопје (2010, 2004, 2003, 2002), Загреб (2009), Грац (2008), Берлин (2008), Луцерн (2008), Битом (2007), Порторико (2004), и други. Нивните заеднички дела се дел од колекцијата на Van Abbemuseum во Ендховен, и колекциите на Deutsche Telekom и Deutsche Bank.
No Comments